පාස්කුව ආරම්භ වන්නේ ආලේලූයියා සෙනසුරාදා නොව මහ බ්‍රහස්පතින්දා ඉර බැසීමත් සමග සිදුවන දිව්‍ය පූජාවෙනි.
මහ බ්‍රහස්පතින්දා ,මහ සිකුරාදා සහ ආලේලූයියා සෙනසුරාදා යන දින තුන පුරාවටම සිදුවන්නේ එකම වන්දනා පිළිවෙතකි.
මහ බ්‍රහස්පතින්දා සවස ආරම්භ වන පාස්කු පිළිවෙත් අවසන් වන්නේ ආලේලූයියා සෙනසුරාදා මධ්‍යම රාත්‍රී දිව්‍ය පූජාවෙනි..
අද පස්වරුවේ සිට සියලුම දෙව්මැදුරු වල සීනු නාද නොකරන අතර නැවත් සීනු නාද වන්නේ ජේසුස් වහන්සේගේ උත්ථාන රාත්‍රියේදීය...

----------------

 







 

🕯

🌾🥖 මහ බ්‍රහස්පතින්දා 🥖🌾
**************************
"මා සිහි කිරිම පිණිස මෙය සිදුකරන්න"
📌 ශු.සභා මාතාව සියලු විශ්වාසකයින්ගේ ඒකාත්මික සහාභාගීත්වය තුළ, අප සුවාමිවූ ක්‍රිස්තුන් වහන්සේගේ අතී ප්‍රේමනීය හා මහිමාන්විත රාත්‍රී භෝජනය අද පවත්වන්නීය. කැඩුණු බිඳුණු හා විසිරුණු අප තුළ වූ පුත්‍රභාවය, නැවත පිහිටු වීමට පැමිණියා වූ ස්වාමින් වහන්සේ මෙවන් වූ සැඳැවක පසුදින තම ප්‍රාණය කුරුස ගසේ දී පිදීමට මත්තෙන්, සදාකාලික ජීවන දායක භෝජනය බවට පත්වී, අප අතර වැඩසිටිමට තීරණය කළ සේක. ඒ වූ ප්‍රේමාන්විත වැඩසිටිම අපගේ සවිය යි. බලය යි, ජීවනය යි.
📌 ශුද්ධවූ සතියේ සුවිශේෂී දිනයකි මහ බ්‍රහස්පතින්දා. මහ බ්‍රහස්පතින්දා යනු ක්‍රිස්තුස් වහන්සේ අන්තිම රාත්‍රී භෝජනයට සහභාගී වී පාද දෝවනය කර ඉන්පසු ගෙත්සමනියට ගිය බව අපි දැන සිටිමු. එය නිවැරදි බව සත්‍යකි. ක්‍රිස්තුස් වහන්සේ අන්තිම රාත්‍රී භෝජනයට සහභාගී වී අනතුරුව පාවා දෙනු ලැබීම තුල උන්වහන්සේගේ පාස්කුව සිදු වූ බව අභිධාර්මිකව සත්‍යක් ය යන්න සදහන් කල යුතුය. මේ සමගම එදින ක්‍රිස්තුන් වහන්සේ ශුද්ධවූ දිව්‍ය සත්ප්‍රසාදය සහ තම එඩේරික ජීවිතය තුලින් පුජත්වරය නම් වූ ප්‍රසාධ නිධාන ස්ථාපිත කිරීම ඉතා සුවිශේෂී කාරණයකි. එදින දේවස්ථානය තුල සවස් භාගයේදී මෙම සිදුවීම් සිහිපත් කරනු ලබන අතරම තවත් එදින පෙරවරුවේ සිදු කරනු ලබන සුවිශේෂී කාරණයක් වන්නේ තෛල ආශිර්වාද කිරීමය. වර්ෂය පුරාවට දේවස්ථානයන්හි භාවිතයට ගැනෙන ශුද්ධවූ තෛලය ආශිර්වාද කර පුජා ප්‍රසාදිවරුන්ගේ කැපවීම අලුත් කරනු ලබන්නේද මහ බ්‍රහස්පතින්දා දිනයේදීය. සෑම රදගුරු වසමකම රදගුරු තුමා ප්‍රමුඛ පුජා ප්‍රසාදීන් වහන්සේලා එක්වී ගිහි ජනතාව සහ පැවදි අය සමගින් දිව්‍ය පුජාවන් සදහා සක්‍රමේන්තුවට අවශ්‍ය කරන ශුද්ධවූ තෛලය ආශිර්වාද කර පුජා ප්‍රසාදීන්ගේ කැපවීම අලුත් කිරීම මහ බ්‍රහස්පතින්දා දිනයේ සිදු කරති.
📌 මේ ශු.දිනයේ දේව වචනය තුළින් ද අප පෝෂණය කරනුයේ, ඒ වූ විශ්වාසයේ ජීවිතයකට ස්වාමින් වහන්සේ හා අත්වැල් බැඳගෙන ගමන් කිරිමට ය. උන්වහන්සේ නියමිත වේලාව පැමිණි කල, "මා වේදනා විඳිමට පළමුවෙන් මේ පාස්කු භෝජනය ඔබ සමඟ වැළඳීමට ආශා වෙමි"යැයි පවසමින්: අප සමග නතර වන්නට සත්ප්‍රසාදීය ස්වාමින් වහන්සේ හා එතුමන්ගේ අමිල සුවදානයේ රිධිරයෙන් නව ගිවිසුම ස්ථාපිත කළ සේක. ඒ ගිවිසුම වූ කලි එදා මුළු මහත් විශ්වයම ජන්ම පාපයේ පිළිලය ගෙන අකීකරුකමේ හා අත්මාර්ථයේ ආහාරය නොව: කීකරුකමේ හා පරිත්‍යාගයේ සදා අමරණීය ප්‍රේමයේ සළකුණ ය. මෙලෙස එදා රත්‍රියේ දි "මා සිහි කිරිම පිණිස මෙය සිදුකරන්න" යැයි පවසමින් විශ්වයේ උත්තම පූජකයාණන්, තම සභාව ජීවනයේ ආහාරයෙන් පෝශනය කරනු පිණිස, මිනිස් ශ්‍රමයෙන් උපද්දන දිරා යන ආහාරය සදාකාලික ආහාරය ලෙස තම සිරි සිරුර හා රුධිරය බවට පත් කිරිමට පූජාත්වරය නම් වූ සක්‍රමේන්තුව ස්ථාපිත කළ සේක. පාස්කු පූජ්‍ය දින ත්‍රිත්වයේ පළමු දිනය වන මහ බ්‍රහස්පතින්දා හිරු බැසීමත් සමඟ ජේසුස් වහන්සේගේ අන්තිම රාත්‍රි භෝජනය සිහිපත් කරන දිව්‍ය යාගය ආරම්භ වේ. උන්වහන්සේ දිව්‍ය සත්ප්‍රසාද වහන්සේ ස්ථාපිත කිරීමත්, පූජකවරය ස්ථාපිත කිරීමත්, පාද දෝවනය මඟින් ලබාදුන් අලුත් ආඥාවත් මෙහිදී විශේෂයෙන් සැමරේ. එම නව පණත (New Mandate - Mandatum Novum) යන්න හරහා බිඳී ආ වචනයකින් අතීතයේ මේ දිනය Maundy Thursday ලෙස හැඳින්විය. මෙදින සුරදූත ගීය ගයත්ම දේවස්ථානයේ සීනු නාද කෙරේ. යළි සීනු නාද කෙරෙන්නේ ආලේලුයියා සෙනසුරාදා රාත්‍රීයේ සුරදූත ගීය ගයනා කරන විටදීය.
📌 මෙදින දේව වාක්‍ය පිළිවෙතේදී ඉශ්‍රායල්වරුන්ගේ පළමු පාස්කු භෝජනයත්, පාවුලු තුමා ලියා ඇති පරිදි ජේසුස් වහන්සේගේ අවසන් රාත්‍රි භෝජනයත්, ජොහාන් සුබාරංචිය අනුව පාද දෝවනය හා නව ආඥාව ගැනත් අසන්නට ලැබේ. දේශනයෙන් පසු තෝරාගත් දොළොස් දෙනෙකුගේ පාද පියතුමා විසින් සෝදනු ලැබේ. මෙදින දිව්‍ය පූජාවේදී මහ සිකුරාදා දිනයටත් සෑහෙන පරිදි දිව්‍ය සත්ප්‍රසාද වහන්සේ කැපකිරීම සිදුවේ. මෙදින බොදුනෙන් පසු යැදුම නිමාවත්ම දිව්‍ය සත්‍ප්‍රසාද වහන්සේ තැන්පත් කර ඇති බඳුනක් පූජාසනයට බැහැරින් සූදානම් කර ඇති මණ්ඩපයක් කරා පෙරහැරින් රැගෙන එනු ලැබේ. කැපකරනලද ඉතිරි දිව්‍ය පූප වෙනම සූදානම් කරන ලද ස්ථානයක තැන්පත් කෙරේ. දිව්‍ය යාගය නියමිත වචන වලින් අවසන් නොකෙරෙන අතර දිව්‍ය පූපය තැන්පත් කෙරෙන්නේ කරඬුවේ නොවේ. දිව්‍ය සත්ප්‍රසාද නිවහන හිස් කෙරෙන අතර , පූජාසනයේ ඇතිරිලි ඉවත් කරනුලැබේ. කුරුස ප්‍රතිමා හැකි තරම් ආවරණය කිරීම හෝ බැහැරව තැබීම සිදුවේ. විශේෂ මණ්ඩපය අසල රැඳෙන සැදැහැවතුන් මධ්‍යම රාත්‍රීය දක්වා යැදුම් වල යෙදෙති.